Европскиот парламент порача дека напредокот на Србија на патот кон Европската Унија зависи од спроведувањето реформи во областа на владеењето на правото и почитувањето на демократските стандарди.
Во објава на социјалната мрежа Икс, Европскиот парламент нагласи дека Србија мора да покаже вистинска посветеност кон вредностите на Европската Унија.
„Напредокот кон членството во ЕУ е можен само преку реформи во владеењето на правото и зајакнување на демократските стандарди“, се наведува во објавата.
Од Европскиот парламент исто така беше посочено дека Србија треба да ги нормализира односите со Косово и беше оценето дека слободните и фер избори се неопходни за надминување на актуелната политичка криза во земјата.
Во објавената графика се потсетува дека Србија е официјален кандидат за членство во Европската Унија од 2012 година, има околу 6,6 милиони жители, а бруто домашниот производ по жител изнесува 13.526 евра.
