Еврозоната во мај годинава забележала трговски дефицит од 7,8 милијарди евра во размената на стоки со остатокот од светот, што претставува најголем месечен дефицит од април 2023 година, покажуваат првичните проценки на Евростат.
Резултатот е значително полош во споредба со истиот месец лани, кога еврозоната оствари трговски суфицит од 15 милијарди евра.
Во мај 2026 година извозот на стоки од еврозоната достигнал 243,6 милијарди евра, што е раст од 0,1 отсто на годишно ниво. Во исто време, увозот пораснал за 10 отсто и изнесувал 251,4 милијарди евра.
Според Евростат, трговскиот дефицит главно се должи на зголемениот дефицит во енергетскиот сектор, како и на намалениот суфицит во трговијата со машини, возила и хемиски производи.
Во периодот од јануари до мај годинава, еврозоната остварила трговски суфицит од 3,3 милијарди евра, што е значително помалку во споредба со 78,7 милијарди евра во истиот период минатата година.
Европската Унија, пак, во мај забележала трговски дефицит од 12,1 милијарда евра. Извозот на стоки од ЕУ кон остатокот од светот изнесувал 215,7 милијарди евра, што е намалување од 1,1 отсто на годишно ниво, додека увозот пораснал за 10,8 отсто и достигнал 227,8 милијарди евра.
Податоците покажуваат и дека извозот на Европската Унија во Соединетите Американски Држави се намалил за 12,3 отсто и изнесувал 40,8 милијарди евра, додека увозот од САД се зголемил за 17,1 отсто, достигнувајќи 32,9 милијарди евра.
Трговскиот суфицит на Европската Унија во размената со САД во мај изнесувал 7,9 милијарди евра, што е значително помалку од 18,4 милијарди евра забележани во истиот месец минатата година.
Евростат најави дека следниот извештај со ажурирани податоци ќе биде објавен на 14 август.
