ВМРО-ДПМНЕ преку соопштение ги отфрли обвинувањата на СДСМ дека со ребалансот на Буџетот се намалуваат средствата за младите, оценувајќи дека станува збор за манипулации кои, според партијата, не се поткрепени со факти.
Од владејачката партија тврдат дека Владата спроведува конкретни мерки и програми насочени кон младите и наведуваат дека од август ќе започне програмата „Месеци на практикантство“, која ќе се реализира во соработка со државните универзитети и општините.
Според ВМРО-ДПМНЕ, преку оваа програма студентите ќе имаат можност директно да се вклучат во работата на локалната самоуправа и да стекнат практично искуство.
Во реакцијата се наведува дека буџетот за наука е зголемен од 380 милиони денари во 2024 година на 773 милиони денари во 2026 година, додека средствата за високото образование, според партијата, пораснале од помалку од три милијарди денари во 2022 година на осум милијарди денари во 2026 година.
Од ВМРО-ДПМНЕ како мерки за поддршка на младите ги посочуваат и доделувањето 55.000 ваучери за набавка на електронски уреди, финансиска поддршка од 10.000 евра за започнување сопствен бизнис преку Оперативниот план за вработување, поддршка за млади земјоделци, како и проширувањето на опфатот на субвенционираниот студентски оброк.
Во соопштението се наведува и дека се инвестирало во образовната инфраструктура, при што, според партијата, биле обезбедени 70 милиони евра за реализација на повеќе од 90 инфраструктурни проекти во образованието.
Од ВМРО-ДПМНЕ порачаа дека Владата продолжува да работи на политики и проекти насочени кон подобрување на условите за младите и создавање можности тие својата иднина да ја градат во државата.
