Филипче до Мицкоски: Предупредувавме, кризата сега ја плаќаат граѓаните

Претседателот на СДСМ, Венко Филипче, на денешната собраниска седница оцени дека мерките на Владата немаат реален ефект врз заштитата на животниот стандард и дека граѓаните веќе се соочуваат со сериозен бран на поскапувања.

— реклама —

Обраќајќи се до премиерот Христијан Мицкоски, Филипче истакна дека растот на цените бил очекуван и навремено најавуван од експерти, но дека институциите не реагирале.

„Растот на цената на нафтата ќе влијае врз сите други производи – и тоа сега се случува. Владата не реагираше навреме и денес имаме спирала на поскапувања“, рече Филипче.

— реклама —

Тој нагласи дека граѓаните веќе ги чувствуваат последиците, посочувајќи дека основните прехранбени производи бележат раст од 5 до 10 проценти, додека кај овошјето и зеленчукот поскапувањата достигнуваат и до 200–300 проценти.

— реклама —

Филипче ја критикуваше и одлуката да не се прифати предлогот за зголемување на минималната плата на 600 евра, оценувајќи дека тоа дополнително ја влошува состојбата на работниците во услови на раст на цените на горивата, кои, како што рече, се зголемени за околу 40 проценти.

Во однос на споредбите со регионот, тој посочи дека тие се нецелосни доколку не се земе предвид животниот стандард.

— реклама —

„Во Хрватска и Словенија има слични цени на горивата, но минималната плата е 1.000 до 1.500 евра. Не може да се споредуваат само цените без да се споредат и платите“, изјави Филипче.