Претседателот на СДСМ, Венко Филипче, упати остри критики кон премиерот Христијан Мицкоски и Владата, обвинувајќи ги дека работат исклучиво во сопствен интерес, додека граѓаните и младите генерации ја плаќаат цената за, како што рече, нивните погрешни политики и блокирањето на европската иднина на државата.
Филипче во своето обраќање директно му се обрати на Мицкоски.
„Лесно ти е тебе и на твојата банда. Се грижите само за вас. На крај памет не ви паѓа како живеат граѓаните тука во државата“, порача Филипче.
Тој оцени дека најголемите последици од политиките на актуелната власт не ги чувствуваат функционерите, туку граѓаните и младите.
„Лесно е на оваа власт, со пари од партиски тендери, пари на граѓаните кои секојдневно ги грабаат и со бугарски пасоши во џебовите. Но граѓаните и следните генерации тоа не го заслужуваат“, рече претседателот на СДСМ.
Филипче предупреди дека младите ќе бидат најпогодени од, како што ги нарече, политиките на актуелната власт и порача дека никој нема право да ја загрозува европската перспектива на државата.
„Немате право, ниту политичко ниту морално, ова да ѝ го правите на Македонија и на генерациите кои со години чекаат да се случи европската приказна, посебно на новите и младите генерации“, истакна тој.
Според Филипче, власта намерно создава стравови поврзани со идентитетот и јазикот за да избегне суштински реформи.
„Ги плашат луѓето дека постои ризик за идентитетот и јазикот, само за да не се случува ништо и за да можат да продолжат со партиските тендери. Ништо друго не се случува. Тоа е концептот на владеење на оваа група“, рече Филипче.
