ВМРО-ДПМНЕ преку соопштение упати нови критики кон лидерот на СДСМ, Венко Филипче, обвинувајќи го дека, како што велат, „ги спроведува бугарските интереси“ и користи ист речник како официјална Бугарија.
Во партиското соопштение се наведува дека Филипче, според ВМРО-ДПМНЕ, „тргнал по стапките на“ Зоран Заев и дека бил подготвен да ги прифати бугарските барања поврзани со евроинтегративниот процес.
Од владејачката партија тврдат дека Филипче се ставил „на располагање“ на бугарскиот претседател Румен Радев и дека јавно се залагал за исполнување на условите што ги поставува Софија.
Во реакцијата, ВМРО-ДПМНЕ дополнително обвинува дека Филипче и СДСМ водат, како што велат, „антимакедонска политика“, додавајќи дека граѓаните нема повторно да поддржат политики кои, според нив, задираат во националниот идентитет.
Партијата воедно оценува дека довербата во Филипче е ниска и дека граѓаните, како што наведуваат, „ги научиле лекциите од минатото“.
