ВМРО-ДПМНЕ преку соопштение обвини дека лидерот на СДСМ, Венко Филипче, е подготвен да тргува со македонскиот идентитет и националните интереси со цел да дојде на власт.
Од владејачката партија тврдат дека Филипче не ги брани државните и националните позиции, туку, како што наведуваат, е фокусиран исклучиво на сопствената политичка кариера.
„Венко Филипче секојдневно потврдува дека е подготвен да оди и подалеку од Зоран Заев во исполнувањето на барањата кои директно ги засегаат македонските национални интереси“, наведуваат од ВМРО-ДПМНЕ.
Од партијата посочуваат дека додека Бугарија, според нив, продолжува да го негира македонскиот јазик, да ја оспорува историјата и идентитетот, Филипче не реагирал соодветно и не застанал јасно во одбрана на македонските позиции.
ВМРО-ДПМНЕ оценува дека ставовите на Филипче претставуваат продолжение на политиките на СДСМ, за кои велат дека донеле отстапки и штета за македонските национални интереси.
„Граѓаните добро паметат што значеа политиките на Заев и СДС. Затоа нема да дозволат истата политика на национални отстапки да се врати под ново име и со нов извршител“, се наведува во партиското соопштение.
Од ВМРО-ДПМНЕ порачуваат дека граѓаните ќе знаат да препознаат кој, според нив, ги брани националните интереси, а кој е подготвен да ги жртвува за политички цели.
