ВМРО-ДПМНЕ преку соопштение упати остри критики кон лидерот на СДСМ, Венко Филипче, обвинувајќи го дека води политика спротивна на македонските национални интереси.
Од партијата тврдат дека Филипче, „како пиун на Румен Радев“, е подготвен на нови отстапки поврзани со македонскиот идентитет и дека не реагирал на употребата на терминот „северномакедонци“ од страна на бугарската министерка Велислава Петрова Чамова.
Во соопштението, ВМРО-ДПМНЕ оценува дека терминот е „навредлива и непостоечка кованица“, а како причина за неговата употреба го посочува Преспански договор.
„Филипче не ја осуди ваквата изјава на бугарската министерка, ниту побара тоа да не се повтори“, наведуваат од ВМРО-ДПМНЕ.
Партијата дополнително обвинува дека Филипче е „главен лобист за прифаќање на бугарскиот ултиматум“ и дека одбива консензус за националните прашања и реформската агенда.
Од ВМРО-ДПМНЕ тврдат и дека Филипче треба јавно да објасни „со што е уценет“ за да води, како што велат, политика на штета на Македонија и македонскиот народ.
