Од ВМРО-ДПМНЕ преку соопштение обвинија дека лидерот на СДСМ, Венко Филипче, ја продолжува политиката на национални отстапки без гаранции и се обидува да ги убеди граѓаните дека уставните измени се прифатливи без јасно обезбедени механизми за заштита на државните интереси.
Според владејачката партија, реториката што денес ја користи Филипче е идентична на онаа што своевремено ја користел поранешниот премиер Зоран Заев во процесот на уставните измени поврзани со промената на името на државата.
„Заев тврдеше дека тоа е последниот чекор кон членството во Европската Унија, но наместо напредок Македонија доби нови блокади, нови вета и дополнителни условувања од Франција и Бугарија“, наведуваат од ВМРО-ДПМНЕ.
Од партијата посочуваат дека Филипче не нуди конкретни гаранции како би се спречиле идни блокади на евроинтегративниот процес и како би се обезбедила сигурност дека земјата повторно нема да се соочи со нови условувања.
ВМРО-ДПМНЕ повторува дека членството во Европската Унија останува стратешка цел на државата, но смета дека тоа не смее да биде причина за нови отстапки без јасен исход и без гаранции од европските институции.
„Нема да дозволиме повторно да биде прегазена волјата на граѓаните. Националните интереси мора да бидат заштитени, а секој следен чекор на евроинтегративниот пат треба да биде заснован на јасни гаранции“, порачуваат од партијата.
Оттаму додаваат дека СДСМ и ДУИ ја довеле државата во позиција да го промени уставното име без да ги добие ветените придобивки во евроинтегративниот процес и оценуваат дека Македонија подоцна станала предмет на нови билатерални спорови и блокади.
