Претседателот на СДСМ, Венко Филипче, обвини дека премиерот Христијан Мицкоски дошол на власт со лаги поврзани со името и надворешната политика, оценувајќи дека таквата реторика сега ја држи државата во изолација.
Во гостување во централниот Дневник на МТВ, Филипче рече дека ВМРО-ДПМНЕ ветувало поништување на договорите и враќање на старото име, но дека ништо од тоа не е реализирано.
„ВМРО-ДПМНЕ не ја зборува вистината. Ако тие не се помрднуваат од позицијата каде што се сега, а нас не обвинуваа за предавство, дали тоа значи дека и тие се предавници? Тие викаат ‘ни чекор понатаму’. Што значи тоа? Дека ние сме ги заштитиле идентитетските одредници – јазикот, националниот идентитет, културата. Што беа нивните ветувања? Ќе го менуваа името, немаше да го прифатат Преспанскиот договор, немаше да го користат новото име Северна Македонија. Зошто не го поништат договорот за добрососедство со Бугарија како што ветуваа? Зошто не го вратат старото име како што ветуваа? Значи доаѓаме до заклучок дека лажна им била кампањата и со лаги дојдоа на власт“, рече Филипче.
Тој нагласи дека е неопходно отворање на преговорите со Европската Унија и укажа на финансиските придобивки што ги добиваат земјите од регионот.
„Сите земји на Западен Балкан годишно добиваа околу 6 милијарди евра, од кои приближно 1 милијарда неповратни грантови од Европа. За истиот период, Хрватска и Бугарија добиле по 40 милијарди евра неповратна помош за развој на државата и бенефит за граѓаните. Зошто не сакаме да го направиме тој чекор? Зошто Мицкоски не каже што значи национално предавство? Што е за него национално предавство, односно како уставните измени во коишто ги ставаме не само Бугарите и Хрватите во уставот е национално предавство? Зошто? Затоа што човекот одработува за Србија, за Унгарија и преку тоа за Русија“, рече Филипче.
