Од владејачката ВМРО-ДПМНЕ преку соопштение упатија остри критики кон лидерот на Социјалдемократски сојуз на Македонија, Венко Филипче, обвинувајќи го дека неговите ставови за односите со Бугарија се спротивни на националните интереси.
Од ВМРО-ДПМНЕ посочуваат дека Филипче изјавил оти Бугарија не го негирала македонскиот идентитет, иако, според партијата, официјална Софија има јасно изразени ставови по однос на македонскиот јазик и идентитет.
Во соопштението се наведува дека Филипче смета оти внесувањето на Бугарите во Уставот би придонело за зајакнување на идентитетот и дека на тој начин тој не би бил загрозен.
„Заев еднаш веќе го отвори Уставот, а Филипче чека да дојде на ред за да го направи истото“, се наведува во партиското соопштение.
Од ВМРО-ДПМНЕ тврдат дека СДСМ и Филипче се подготвени на нови отстапки во односите со Бугарија, со цел, како што наведуваат, да добијат политичка поддршка.
Воедно, владејачката партија ја обвини опозицијата дека не учествува активно во политичкиот дијалог и дека бојкотира работни групи и други процеси поврзани со реформите.
„Нивната цел и стратегија се сведува само на враќање на власт, без разлика по која цена и преку какви компромиси“, се наведува во реакцијата на ВМРО-ДПМНЕ.
Од партијата, исто така, оценија дека политиките на СДСМ во минатото довеле до, како што велат, „редефинирање на историјата“ и нанесување штета врз државните интереси.
