ВМРО-ДПМНЕ преку соопштение упати остри критики кон лидерот на СДСМ, Венко Филипче, обвинувајќи го дека е подготвен да прифати уставни измени без гаранции и дека, како што наведуваат, „се додворува на Бугарија“.
Од ВМРО-ДПМНЕ велат дека Филипче во последниот период станал „погласен за бугарските барања отколку за македонските црвени линии“, оценувајќи дека уште пред формирањето на новата влада во Бугарија, јавно изразувал подготвеност за уставни измени.
Во соопштението се наведува дека по изборот на Румен Радев за премиер, Филипче дополнително ги засилил своите ставови за евроинтегративниот процес и уставните измени.
„Ставовите на Радев се одамна јасни, особено околу јазикот, идентитетот и историјата, а Филипче настапува како граѓаните да не се запознаени со тие позиции“, соопштија од ВМРО-ДПМНЕ.
Партијата обвини дека СДСМ повторно се обидува да ја убеди јавноста дека токму тие се факторот што ќе ја внесе државата во Европската Унија, споредувајќи го настапот на Филипче со политиките на поранешниот премиер Зоран Заев.
Во соопштението се додава дека граѓаните веќе двапати ги казниле овие политики на избори и дека, според ВМРО-ДПМНЕ, СДСМ продолжува да губи поддршка поради ставовите поврзани со евроинтеграциите и односите со Бугарија.
