ВМРО-ДПМНЕ преку соопштение реагираше на изјавите на претседателот на СДСМ, Венко Филипче, обвинувајќи го дека ги застапува ставовите на официјална Софија и настапува спротивно на македонските национални интереси.
Од партијата велат дека Филипче во своите јавни настапи ги повторува позициите на бугарските политичари, особено во делот на евроинтеграциите и уставните измени.
Според ВМРО-ДПМНЕ, и СДСМ и бугарските власти тврдат дека уставните измени се единствениот услов за продолжување на европскиот пат на државата, што, како што наведуваат, претставува прифаќање на бугарските позиции.
Во реакцијата се посочува дека Владата активно ја спроведува Реформската агенда и дека тоа е потврдено и од европските институции, кои одобриле финансиска поддршка во износ од 65,7 милиони евра за земјава.
Партијата се повикува и на изјавите на претседателот на Европскиот совет, Антонио Кошта, кој за време на посетата на Скопје позитивно се осврна на реформските процеси во државата.
„Филипче одлучи да се стави над релевантните европски институции и претставници, при што практично тврди дека Кошта не ја кажува вистината кога зборува за реформите“, наведуваат од ВМРО-ДПМНЕ.
Од владејачката партија додаваат дека самиот Филипче признава оти и по евентуалните уставни измени може да има нови блокади од Бугарија, што, според нив, покажува дека не постојат гаранции за непречен напредок во евроинтегративниот процес.
ВМРО-ДПМНЕ повтори дека останува на ставот оти без јасна предвидливост на процесот, конкретни гаранции за членството во Европската Унија и реципроцитет од бугарска страна, нема да поддржи уставни измени за внесување на Бугарите во Уставот.
