Од ВМРО-ДПМНЕ преку соопштение реагираа на денешната прес-конференција на лидерот на СДСМ, Венко Филипче, оценувајќи дека неговите ставови се спротивни на националните интереси и на напорите за зачувување на македонскиот идентитет во процесот на евроинтеграција.
Во партиското соопштение се наведува дека Филипче повторно ја пропуштил можноста да се приклучи кон, како што велат од ВМРО-ДПМНЕ, заедничката борба за заштита на државните и националните интереси во односите со Европската Унија.
Од владејачката партија обвинуваат дека претседателот на СДСМ со своите настапи ги поддржува барањата и позициите кои, според нив, се на штета на македонскиот идентитет, јазик и историја.
„Местото на Македонија е во Европската Унија, но евроинтегративниот процес мора да се води достоинствено, без идентитетски отстапки и врз основа на реформите и Копенхашките критериуми“, се наведува во реакцијата.
Од ВМРО-ДПМНЕ ги отфрлаат и критиките на Филипче во однос на економските политики, посочувајќи дека во изминатиот период е забележан континуиран раст на БДП, исплатени се заостанати субвенции кон земјоделците и обезбедени се средства за исплата на долгови оставени од претходната власт.
Во соопштението се наведува дека Владата исплатила заостанати земјоделски субвенции во висина од четири милијарди денари, како и неисплатени плати во јавни претпријатија во вредност од 350 милиони денари.
Партијата посочува и на раст во земјоделското производство, вклучително и кај млекото, јајцата, свинското месо и пченицата, како и на зголемувањето на платите во повеќе сектори преку потпишани колективни договори.
Од ВМРО-ДПМНЕ тврдат дека до крајот на мандатот платите во повеќе области ќе бидат зголемени за меѓу 40 и 50 проценти, оценувајќи дека економските показатели покажуваат напредок, а не стагнација како што тврди опозицијата.
