ВМРО-ДПМНЕ преку соопштение реагира на изјавите на лидерот на СДСМ, Венко Филипче, во врска со одлуката на обвинителството да не поведе обвинение против него за случајот со 19 модуларни болници, меѓу кои и болницата во Тетово каде во пожарот загинаа 14 лица.
Од партијата велат дека Филипче сега се повикува на одлуката на Ислам Абази како потврда дека нема одговорност за случајот, иако токму системот на правосудството што, како што наведуваат, го создавале СДСМ и ДУИ додека биле на власт, го довел правосудството до исклучително ниска доверба кај граѓаните.
„Венко Филипче сега се фали со одлуката на Ислам Абази да не поведе обвинение против него за 19 модуларни болници, меѓу кои и модуларната болница во Тетово, каде во пожар животот го изгубија 14 лица“, наведуваат од ВМРО-ДПМНЕ.
Според партијата, модуларните болници биле поставени без почитување на Законот за градење и без да се земат предвид забелешките на стручната јавност, а Филипче не бил повикан на одговорност за тоа.
Од ВМРО-ДПМНЕ обвинуваат дека Филипче истовремено зборува за Европската Унија, владеењето на правото и европските вредности, но како аргумент ја користи одлуката на обвинителство за кое самата партија тврди дека е дел од нефункционален систем.
„Филипче зборува за ЕУ, владеење на право и европски вредности, а истовремено се повикува на системот кој СДС и ДУИ го уништија додека беа на власт“, стои во реакцијата.
Од партијата додаваат дека европските стандарди подразбираат независно и кредибилно правосудство, а не систем во кој, според нив, обвинителите постапуваат под политички влијанија.
ВМРО-ДПМНЕ смета дека ваквите одлуки и начинот на кој се толкуваат можат да ѝ нанесат штета на државата во процесот на европска интеграција, особено во делот на владеењето на правото.
„ЕУ бара независно правосудство, но наместо тоа, Филипче ја слави одлуката на обвинител поставен во систем чија кредибилност самиот тој придонел да ја урне“, наведуваат од ВМРО-ДПМНЕ.
Од партијата заклучуваат дека односот кон ваквите одлуки, наместо да придонесе за враќање на довербата во правосудството, дополнително го отвора прашањето за неговата независност и кредибилитет.
