ВМРО-ДПМНЕ преку соопштение реагира на денешната прес-конференција на претседателот на СДСМ, Венко Филипче, во која тој ја коментираше одлуката за затворање на предметот поврзан со набавката на модуларната болница во Тетово.
Од партијата обвинуваат дека предметот пет години бил оставен без соодветно постапување, иако во пожарот во модуларната болница загинаа 14 лица. Во реакцијата се тврди и дека Филипче, кого го посочуваат како директно одговорен, не бил повикан ниту на разговор во рамките на предметот.
Од ВМРО-ДПМНЕ оценуваат дека одлуката предметот да заврши без истрага претставува сериозен скандал и го обвинуваат обвинителството дека не разгледало повеќе прашања поврзани со модуларната болница.
„Абази премижa и на менувањето на Законот за градење, премижa и на немањето елаборат за електрична енергија, премижa и на немањето минимум технички спецификации. Премижa сè, за Филипче да биде ослободен“, наведуваат од партијата.
Во реакцијата се обвинува и шефот на ОЈО ГОКК во заминување, Ислам Абази, дека со одлуката овозможил затворање на предметот и дека неговото работење било насочено кон заштита на поранешни функционери на СДСМ и ДУИ.
Од ВМРО-ДПМНЕ додаваат дека Филипче денеска ја поздравил одлуката иако, според нив, веќе извесно време бил запознаен со нејзината содржина.
