Министерот за правда, Игор Филков денеска изјави дека оптимизацијата на судската мрежа е клучна за создавање поефикасно правосудство и поголема правна сигурност за граѓаните.
На стручната расправа посветена на измените и дополнувањата на Законот за судовите, Филков нагласи дека реформите во правосудството мора да бидат суштински и да донесат реални подобрувања во функционирањето на судскиот систем.
„Реформите во правосудството не смеат да бидат само формални и декларативни. Тие мора да донесат реални подобрувања во функционирањето на судскиот систем и поквалитетна правда за граѓаните“, истакна министерот.
Според предложените законски измени, дел од судовите ќе бидат трансформирани во судски одделенија, со цел поефикасно искористување на човечките и материјалните ресурси, подобра распределба на предметите и поефикасно управување со постапките.
Филков посочи дека промените нема да значат намалување на пристапот до правда за граѓаните, туку обезбедување побрза и поквалитетна судска заштита. Судските одделенија, како што рече, ќе продолжат да функционираат локално, но ќе бидат организациски поврзани со поголемите судови.
Во рамки на реформите се предлагаат и мерки за подобрување на работата на апелационите судови, со цел намалување на заостанатите предмети и поефикасно постапување по жалби.
Министерот нагласи дека предложените решенија се базираат на анализи и проценки на реалните потреби на судовите и граѓаните, додавајќи дека успехот на реформите ќе зависи и од нивната доследна примена во пракса.
