Министерот за правда Игор Филков во соопштение обвини дека СДСМ свесно го блокира процесот на реформи во изборното законодавство, откако поради нивно отсуство била одложена четвртата седница на Работната група.
Како што информираше Филков преку соопштението, на седницата требало да се разгледаат дополнителните забелешки и коментари на политичките партии на препораките на ОБСЕ/ОДИХР, како и предлози од институциите вклучени во изборниот процес, меѓу кои Државната изборна комисија, Агенцијата за аудио и аудиовизуелни медиумски услуги, Агенцијата за администрација и граѓански иницијативи.
Според него, изостанала „политичката зрелост“ која е неопходна за обезбедување фер и демократски избори.
„Не може да зборуваме за фер и демократски избори, а истовремено да не учествуваме во процесот кој треба да ги обезбеди тие стандарди. Демократијата подразбира дијалог, компромис и заедничка одговорност“, изјави Филков.
Тој оцени дека СДСМ со ваквиот пристап ја блокира реформската агенда и го кочи европскиот напредок на државата, додавајќи дека ова не е прв ваков случај, потсетувајќи и на блокадата на Законот за Јавното обвинителство во Собранието.
Филков посочи дека поради ваквото однесување се загрозени и финансиски средства наменети за реформите, наведувајќи дека станува збор за над 4,2 милиони евра поврзани со изборните реформи и дополнителни над 6,4 милиони евра поради блокадата на законот за јавно обвинителство, стои во соопштението.
Министерот порача дека Владата ќе продолжи со реформите, со цел обезбедување стабилност, владеење на правото и напредок кон европската интеграција, стои во соопштението.
