ВМРО-ДПМНЕ преку соопштение соопшти дека намалувањето на јавниот долг е резултат на, како што наведуваат, одговорното управување со јавните финансии, фискалната дисциплина и рационалното трошење на буџетските средства.
Од партијата посочуваат дека, според најновите официјални податоци, јавниот долг во вториот квартал од 2026 година изнесува 58,8 проценти од бруто-домашниот производ (БДП), што е намалување од 0,1 процентен поен во однос на претходниот квартал.
Во апсолутен износ, како што наведуваат, јавниот долг е намален за 21 милион евра и сега изнесува 10,726 милијарди евра.
ВМРО-ДПМНЕ истакнува дека, во споредба со крајот на 2024 година, јавниот долг е намален за 2,6 процентни поени, а во однос на крајот на 2025 година за 0,6 процентни поени.
„Овие показатели се потврда дека со одговорен пристап и внимателно управување со ресурсите, државата успева да ја зачува финансиската стабилност и да создава услови за економски развој“, се наведува во соопштението.
Од партијата додаваат дека, и покрај сервисирањето на значајни финансиски обврски, Владата успева редовно да ги исполнува обврските, да ја одржи стабилноста на буџетот и паралелно да реализира проекти од значење за граѓаните.
Според ВМРО-ДПМНЕ, намалувањето на јавниот долг претставува доказ за поинаков пристап во управувањето со државните финансии, со фокус на инвестиции, развој, инфраструктура, здравство, образование и отворање нови економски можности.
