Фон дер Лајен: Европа ќе остане недостапна за сите што учествувале во инвазијата врз Украина

Европската Унија подготвува нов, 21. пакет санкции против Русија, кој предвидува забрана за влез на територијата на Унијата за лица кои служеле во руските вооружени сили од почетокот на војната во Украина.

Предлозите денеска ги претстави претседателката на Европската комисија, Урсула фон дер Лајен, нагласувајќи дека мерките сè уште можат да претрпат измени и ќе треба едногласно да бидат одобрени од сите 27 земји членки.

— реклама —

„Европа останува недостапна за сите што учествувале во инвазијата врз Украина. Нашите санкции и понатаму силно погодуваат и длабоко ги засекуваат економските темели на руските воени напори“, изјави Фон дер Лајен.

Покрај забраната за влез на поранешни руски војници, Брисел предлага и задржување на ограничувањето на цената на руската нафта на 44 долари за барел до јануари 2027 година, со цел да се намалат приходите на Кремљ.

— реклама —

На листата би можеле да се најдат уште 30 бродови од таканаречената „флота во сенка“, кои, според ЕУ, ѝ помагаат на Русија да ги заобиколи санкциите. Досега под рестрикции се ставени 632 вакви пловила.

— реклама —

Предлогот предвидува санкции и за 20 банки, криптокомпании и трговци со нафта од трети земји за кои постои сомнеж дека ѝ помагаат на Москва да ги избегне западните ограничувања.

Новите мерки првпат би се прошириле и на увозот на руска риба, вклучително и бакалар, како и на увоз на руски метали, руди и автоделови во вредност од околу 60 милиони евра. Дополнително, се предлагаат ограничувања за извоз на европски метали и легури што се користат во воздухопловната и одбранбената индустрија.

— реклама —

Идејата за забрана за влез на поранешни руски борци прва ја предложи Естонија. Естонскиот министер за надворешни работи, Маргус Цахкна, уште во јануари оцени дека таквата мерка е неопходна за безбедноста на Европа.

Во меѓувреме, Фон дер Лајен потврди и дека ЕУ планира да продолжи со пристапните преговори со Украина и Молдавија, при што следната недела се очекува отворање на првиот сет поглавја поврзани со владеењето на правото и демократските стандарди.