Европската унија го поздрави договорот постигнат меѓу САД и Иран, оценувајќи дека тој може да придонесе за намалување на тензиите на Блискиот Исток и за стабилизирање на глобалните енергетски пазари.
Претседателката на Европската комисија, Урсула фон дер Лајен, порача дека Ормускиот теснец мора повторно да биде отворен без одлагање.
„Слободата на пловидба мора повторно да се воспостави без одгода. Тоа е клучно за регионалната стабилност и за глобалната економија“, истакна Фон дер Лајен.
Таа нагласи дека Европската унија треба да продолжи да бара и алтернативни правци за снабдување, со цел да се намали зависноста од Ормускиот теснец, преку кој поминува значителен дел од светската трговија со нафта и природен гас.
Според неа, ова прашање ќе биде една од темите на состанокот на групата Г7, кој започнува денеска во Франција.
Поддршка за договорот изрази и високата претставничка на Европската унија за надворешна политика и безбедност, Каја Калас, која најави дека министрите за надворешни работи на земјите-членки ќе разговараат за можностите Унијата активно да се вклучи во следната фаза од процесот.
„Во изминатите денови разговарав со иранските и со колегите од земјите од Заливот, а министрите за надворешни работи на ЕУ денеска ќе дискутираат како Унијата може активно да се вклучи во следната фаза“, напиша Калас на социјалната мрежа Икс.
Договорот меѓу Вашингтон и Техеран, кој сè уште треба официјално да биде потпишан, се смета за потенцијално една од најзначајните дипломатски пресвртници на Блискиот Исток во последните години, со директно влијание врз глобалната безбедност и светската економија.
