Фон дер Лајен ја обвини Русија за ескалација во Црното Море по нападот врз цивилен брод

Претседателката на Европската комисија, Урсула фон дер Лајен, изрази длабока вознемиреност поради новата ескалација на руските напади во Црното Море, откако цивилен брод со украински и азербејџански членови на екипажот бил погоден со дрон во близина на брегот на Романија.

— реклама —

„Овие неодговорни напади ги загрозуваат животите на невини луѓе и отворено му пркосат на меѓународното право“, напиша фон дер Лајен на платформата Икс.

Таа изрази сочувство до семејството на загинатиот морнар, како и до блиските на тројцата членови на екипажот кои сè уште се водат како исчезнати. Фон дер Лајен им се заблагодари и на спасувачките екипи кои учествуваат во потрагата.

— реклама —

Романскиот претседател Никушор Дан ја обвини Русија за нападот, оценувајќи дека тој е дел од ескалацијата што Москва ја спроведува во рамките на војната во Украина.

— реклама —

Во нападот со дрон врз товарниот брод „Хорив“, кој пловел под знамето на Коморските Острови, загинал еден морнар, а тројца се водат како исчезнати. На бродот имало 10 украински и тројца азербејџански членови на екипажот. Пловилото било тешко оштетено и се превртело.

Романското Министерство за внатрешни работи соопшти дека биле спасени 10 членови на екипажот, од кои едно лице подоцна починало, додека тројца сè уште се водат како исчезнати.

Спасувачката операција била започната откако бродот „Хорив“ испратил повик за помош околу 10 часот по локално време, на околу 24 километри од романското пристаниште Констанца. Во акцијата учествуваат пловила на Романската агенција за спасување на море и на Министерството за внатрешни работи.