Урсула фон дер Лајен утре ја завршува регионалната турнеја со посета на Скопје, во момент кога Европската унија најавува нов пристап кон проширувањето и постепено вклучување на кандидатите во единствениот пазар. Според информации објавени од „Политико“, Европската комисија подготвува посебни патокази за Црна Гора, Албанија, Украина и Молдавија, додека Македонија не е меѓу четирите земји опфатени со овој план.
Во Брисел се разгледува можноста земјите кандидати постепено да добиваат поголем пристап до единствениот пазар, истражувачките програми и други придобивки уште пред полноправното членство, во зависност од усогласувањето со европските правила и исполнувањето на условите.
Од Тирана, фон дер Лајен порача дека проширувањето е двонасочен процес и дека, покрај земјите кандидати, и самата Европска унија мора да биде подготвена за прием на нови членки. Таа најави дека Брисел ќе ги разгледа сопствените институции, политики и буџетот во рамките на подготовките за идното проширување.
Во меѓувреме, германскиот министер за надворешни работи Јохан Вадефул повика на забрзување на процесот на проширување кон Западен Балкан. Тој оцени дека проширувањето е важен тест за Европа и дека од него ќе зависи влијанието на ЕУ во наредните децении. Германското Министерство за надворешни работи наведува дека Берлин сака земјите од Западен Балкан да бидат поблиску поврзани со ЕУ и во контекст на зголеменото руско влијание во регионот.
Посебно внимание привлече информацијата дека Брисел подготвува јасни и постепени планови за Црна Гора, Албанија, Украина и Молдавија. Според „Политико“, плановите треба да содржат конкретни приоритети, цели и временски рамки за напредокот кон членството.
Во истите информации се наведува дека за Македонија, Косово, Босна и Херцеговина и Србија процесот се одвива побавно, додека Брисел стравува дека долготрајното одложување може да го намали интересот за европската интеграција и да отвори простор за поголемо влијание на Русија и Кина.
Македонскиот премиер Христијан Мицкоски претходно изјави дека нема информација за ваква одлука и дека не знае дали информациите за изоставувањето на Македонија од патоказите се точни.
Во однос на уставните измени, тие остануваат дел од европската интеграција на Македонија. Претседателот на Европскиот совет Антонио Кошта во јуни порача дека усвојувањето на потребните уставни измени е услов за формално започнување на пристапните преговори.
Токму затоа, посетата на фон дер Лајен во Скопје доаѓа во момент на нови европски најави за постепена интеграција и промени во политиката на проширување, но и отворени прашања околу позицијата на Македонија во новиот пристап на Брисел.
