Претседателката Урсула фон дер Лајен предупреди дека војната меѓу Русија и Украина сè повеќе претставува директна закана за државите на источната граница на Европската Унија, откако поморски дрон експлодирал во близина на нафтен терминал во романското пристаниште Констанца.
„Само една недела откако дрон се урна врз станбена зграда во Галац, денес поморски дрон стигна до Констанца. Ова е директна последица од руската војна против Украина и сè повеќе станува директна закана за земјите на нашата источна граница“, напиша Фон дер Лајен на социјалните мрежи.
Таа порача дека солидарноста на Европската Унија со земјите членки што се изложени на вакви ризици е целосна и дека е потребен итен одговор.
Според неа, Европа веќе значително инвестира во системи за заштита од дронови, противвоздушна одбрана и рано предупредување, а механизмот SAFE ќе помогне во дополнително зајакнување на одбранбените капацитети на Романија.
Од романското Министерство за одбрана соопштија дека во експлозијата во Констанца нема жртви ниту повредени лица.
