Претседателката на Европската комисија, Урсула фон дер Лајен, денеска пристигна во Киев, каде што ќе се сретне со украинскиот претседател Володимир Зеленски. Главна тема на разговорите ќе биде продлабочувањето на одбранбената соработка меѓу Европската Унија и Украина, со посебен акцент на производството на дронови.
Ова е втора посета на фон дер Лајен на украинската престолнина годинава. Таа оцени дека ситуацијата значително се променила од нејзината претходна посета во февруари и истакна дека Украина постигнала значителен воен напредок.
„Украина оствари силен воен замав. Ситуацијата се менува. Европската Унија целосно ја исполнува својата улога со заемот од 90 милијарди евра, а во Киев ќе најавам нови иницијативи за продлабочување на интеграцијата на нашите одбранбени индустрии“, изјави фон дер Лајен.
Според најавите, во фокусот ќе биде и договорот за дронови меѓу Украина и Европската Унија, кој треба да овозможи поблиска соработка во производството на беспилотни летала и нивно складирање на територијата на земјите членки на ЕУ.
За време на посетата, Зеленски ќе ѝ го врачи на фон дер Лајен нововоспоставениот Орден на Европа, признание што им се доделува на личности кои придонесуваат за одбраната на Украина и го поддржуваат нејзиниот пат кон Европската Унија.
Фон дер Лајен ќе учествува и на петтиот самит „Украина – Југоисточна Европа“, на кој ќе присуствуваат и лидерите на Хрватска, Молдавија и Романија.
