Појавата на поморско беспилотно летало опремено со експлозив во близина на романската платформа за природен гас „Нептун Дип“ во Црното Море е дел од „хибридна војна“, оцени претседателката на Европската комисија, Урсула фон дер Лајен.
„Во тек е ескалирачка кампања на закани која ги вознемирува нашите граѓани и се обидува да ја подели нашата Унија. Ова е хибридна војна“, напиша Фон дер Лајен на платформата X.
Таа порача дека Европската унија мора да има капацитет за одвраќање провокации и агресија, посочувајќи ја иницијативата „Подготвеност 2030“, која предвидува до 800 милијарди евра за надминување на критичните недостатоци во одбранбените капацитети, интеграција на европскиот одбранбен пазар и постигнување воена подготвеност за екстремни вонредни ситуации до 2030 година.
Фон дер Лајен истакна и дека преку европската иницијатива за одбрана од беспилотни летала и засилениот надзор на источното крило, ЕУ го зголемува производството на одбранбена опрема за да им ги обезбеди потребните капацитети на земјите членки.
„Ова ни овозможува брзо, колективно и одлучно да одговориме на новите закани“, порача претседателката на Европската комисија.
Претходно денеска, романската војска уништи поморско беспилотно летало откако било забележано на неколку стотици метри од платформата „Нептун Дип“, во рамките на романската економска зона, на околу 80 наутички милји источно од Констанца.
Романските власти утврдиле дека леталото било опремено со експлозив, а според нивните наоди, не било од украинско потекло.
