Претседателката на Европската комисија, Урсула фон дер Лајен, остро го осуди начинот на кој во Белград беше одржан погребот на поранешниот командант на Војската на Република Српска, Ратко Младиќ, осуден за геноцид и воени злосторства.
„Сцените од вчерашниот погреб на Ратко Младиќ во Белград беа шокантни. Ратко Младиќ беше осуден воен злосторник. Тој беше одговорен за геноцид, воени злосторства и злосторства против човештвото“, напиша фон дер Лајен на платформата X.
Таа додаде дека е „длабоко за жалење“ присуството на одредени високи српски функционери, како и елементите на официјална поддршка на погребот.
Според фон дер Лајен, ваквите постапки покажуваат неуспех во соочувањето со „темното поглавје од поновата европска историја“ и се спротивни на вредностите врз кои се темели патот на Србија кон Европската Унија.
„Нашите мисли се со сите жртви на злосторствата извршени во земјите од поранешна Југославија“, порача претседателката на Европската комисија.
Младиќ почина во Хаг додека ја издржуваше доживотната затворска казна за геноцидот во Сребреница и други воени злосторства. На неговиот погреб опело служеше српскиот патријарх Порфирије, заедно со епископи на Српската православна црква.
Меѓу присутните биле српски министри, лидерот на владејачката коалиција во Република Српска Милорад Додик, Данило Вучиќ, син на српскиот претседател, како и рускиот амбасадор во Србија Александар Боцан-Харченко.
