Форд Мотор Компани би можел повторно да ги врати моделите „Фиеста“ и „Фокус“ на европскиот пазар, иако претходно беа донесени одлуки за нивно постепено повлекување.
Во разговор за „Мотор1“, директорот на секторот за патнички возила на „Форд“ за Европа, Кристијан Вајнгертнер, отворено зборувал за идните планови на компанијата и причините поради кои „Фиеста“ и „Фокус“ биле ставени во втор план, и покрај нивната голема популарност.
Според него, автомобилската индустрија денес функционира во целосно поинакви услови, пред сè поради постојано променливите еколошки регулативи и стандардите за емисија на штетни гасови.
Поради тоа, „Форд“ во одреден момент проценил дека е поисплатливо да инвестира во развој на електрични возила.
Вајнгертнер посочил и дека пазарот станал многу пофрагментиран, додека производствените обеми во фабриките се намалиле, што ја принудило компанијата да носи тешки одлуки.
Сепак, тој нагласил дека „Форд“ не ја затворил целосно вратата за евентуално враќање на „Фиеста“ и „Фокус“.
Според неговите зборови, двата модели и понатаму претставуваат исклучително силни и препознатливи имиња со големо наследство, особено поради успесите во рели и туринг натпреварувањата, па компанијата сериозно размислува еден ден повторно да ги понуди на пазарот.
Во интервјуто станало збор и за шпекулациите околу можна соработка меѓу „Форд“ и кинескиот бренд Гили.
Вајнгертнер не сакал да ги потврди тие информации, но изјавил дека „Форд“ разговара со различни компании во потрага по најдобро можно партнерство за иднината.
