Грчката општина Касандра на првиот крак од Халкидики објави официјално известување на три јазици – грчки, англиски и македонски. Со ова локалните власти директно им се обратија на бројните туристи од Македонија кои традиционално летуваат во овој дел на Грција.
Известувањето се однесува на спроведувањето на новиот Закон 5092/2024, со кој грчките власти воведуваат построги правила за заштита на јавниот карактер на плажите и крајбрежјето.
Во пораката на македонски јазик се наведува дека чадори, лежалки и друга опрема што без законско право се поставени или се оставаат на јавните плажи, го ограничуваат слободното користење на просторот од останатите посетители. Сопствениците се повикуваат предметите да ги отстранат веднаш, а најдоцна во рок од 24 часа.
Во спротивно, општинските служби ќе пристапат кон нивно отстранување. Според известувањето, целата опрема ќе се третира како напуштен отпад согласно општинските прописи за чистота, без можност подоцна да им биде вратена на сопствениците.
Одлуката да се објави известувањето и на македонски јазик се оценува како практичен чекор, имајќи предвид дека Касандра е една од најпосетуваните дестинации за македонските туристи. Во оваа општина се наоѓаат и популарните летувалишта Калитеа, Ханиоти, Пефкохори и Полихроно.
Со ваквиот пристап, локалните власти настојуваат информацијата навремено да стигне до сите посетители, со цел да се избегнат недоразбирања и да се обезбеди слободен пристап до јавните плажи за сите.
