Необичен пловечки „остров“, прекриен со зелени дрвја и друга вегетација, е забележан на езерото Вилистон во канадската провинција Британска Колумбија, збунувајќи ги дури и експертите.
Роки Ејвери, љубител на пловењето од Британска Колумбија, објавил видео од необичната глетка на социјалните мрежи. Иако изгледа како остров, според достапните информации станува збор за своевиден сплав – пловечка маса на која растат дрвја и друга вегетација.
Постоењето на необичната формација било дополнително потврдено со сателитски снимки. На снимките од сателитот „Сентинел-2“ на Европската вселенска агенција, на 21 јули годинава се гледал мал објект, сличен на зелен остров, на околу 100 километри западно од браната „ВАЦ Бенет“.
Објектот не се гледал на снимките од деновите претходно, а не е познато ниту каде исчезнал во периодот што следел. На 31 август Ејвери објавил дека „островот“ повторно бил забележан, овојпат во реката Оспика, која се влева во езерото Вилистон.
Од „БЦ Хајдро“, компанијата која управува со акумулацијата, велат дека вакво нешто досега не забележале. Сепак, имаат можно објаснување за неговото појавување.
Резервоарот претходно годинава првпат по 14 години достигнал полн капацитет. Поради високото ниво на водата, материјал што можеби со години бил наталожен долж брегот или во заштитен залив можел да се отцепи и да почне да плови.
„Не можеме точно да утврдиме од каде потекнува овој пловечки остров, но тоа е едно објаснување што изгледа разумно“, изјавил портпаролот на „БЦ Хајдро“, Боб Гамер.
Компанијата во јуни и јули испуштала вишок вода откако резервоарот го достигнал максималното ниво. Засега „островот“ не претставува опасност за браната, но на морнарите и рибарите им се препорачува да бидат внимателни поради ваквите необележани пловечки пречки.
