Драматичната ноќ во Омиш и околината довела до голема спасувачка операција на море, во која биле извлечени околу 200 луѓе, меѓу кои и деца, кои поради пожарот побарале засолниште во морето и на чамци.
Операцијата започнала синоќа во 23:40 часот, откако било пријавено дека голем број луѓе се наоѓаат во морето и на чамци без надзор, обидувајќи се да се заштитат од огнената стихија. Акцијата ја координирал Националниот центар за координација на пребарување и спасување на море во Риека, во соработка со Капетанијата на пристаништето во Сплит и нејзините ограноци.
Во спасувањето биле ангажирани сите расположливи чамци на капетаниите во Сплит, Макарска, Милна и Хвар. Во операцијата учествувале и два полициски брода, брзиот чамец „Модрољ“ на Хрватската крајбрежна стража, како и пловило на Царинската управа. Помош пружиле и припадници на Хрватската планинска служба за спасување, граѓани и приватна компанија со патнички чамец.
Во меѓувреме, состојбата кај Локва Рогозница утрово е подобра. Началникот на противпожарната служба Славко Туцаковиќ изјави дека пожарот повеќе не се шири.
Според првичните процени, огнот зафатил околу 900 хектари трева, ниска вегетација и борова шума. На терен се распоредени 210 пожарникари со 61 противпожарно возило, а во гаснењето учествуваат и екипи пристигнати од повеќе хрватски жупании.
Четири „канадери“ утрово биле испратени кон Локва Рогозница и Омиш, но подоцна биле пренасочени кон новиот пожар на Пељешац. Во Локва Рогозница и Омиш во меѓувреме дејствуваат три „ер трактори“.
Пожарот остави и повредени. Во Клиничкиот центар во Сплит медицинска помош побарале 36 лица поради повреди здобиени во пожарот. Четиринаесет лица биле задржани во болница, додека останатите биле пуштени на домашно лекување. Седум пациенти се наоѓаат на интензивна нега и, според информациите, нивниот живот е во опасност.
