Царински службеници од Царинарница Скопје во еден ден откриле 12 илегални мигранти со потекло од Египет и Судан, при контрола на стока пријавена за увозно царинење во две различни испостави.
Првиот случај бил откриен во царинскиот терминал во Тетово. Царинските службеници уште пред да започнат со контрола на камионот се посомневале дека во товарниот дел може да има илегални мигранти, поради што побарале асистенција од Министерството за внатрешни работи.
По извршената контрола, во товарниот дел биле пронајдени пет илегални мигранти.
Само два часа подоцна, во царинскиот терминал Скопје 3, при контрола на стока пријавена за увозно царинење, биле откриени уште седум илегални мигранти.
Сите 12 лица биле предадени на Министерството за внатрешни работи.
Од Царинската управа посочуваат дека фактот што двата случаи биле откриени во еден ден укажува на будноста при следењето на состојбите поврзани со илегалната миграција.
Според последните податоци на Фронтекс, илегалната миграција преку западнобалканската рута бележи пад од 42 проценти. Оттаму додаваат дека соработката дава резултати, но дека останува потребата од будност и подготвеност за нови предизвици.
