Во Битола денеска започна комеморативната програма по повод 110-годишнината од Кајмакчаланската битка, со положување свежо цвеќе на српските воени гробишта. Дводневното одбележување е организирано од Заедницата на Србите во Македонија – Битола.
На комеморацијата присуствуваа членови на српската заедница, граѓани на Битола и гости од Србија. Претседателот на Заедницата, Зоран Жугиќ, потсети дека интересот за одбележувањето низ годините се зголемувал, посочувајќи го значењето на српските воени гробишта во Битола.
Кајмакчаланската битка се водела од 12 до 30 септември 1916 година, меѓу српските и бугарските сили, во рамките на Битолската офанзива. Борбите се одвивале на врвот на планината Ниџе, на надморска височина од 2.524 метри, при тешки временски услови и со големи загуби на двете страни.
По 18 дена борби, на 30 септември 1916 година, српските сили го презеле врвот. Според податоците наведени на одбележувањето, српската армија во операцијата претрпела околу 5.000 загинати, ранети или исчезнати војници.
На комеморацијата се обрати и министерката за работа и социјални прашања на Србија, Милица Џурџевиќ Стојковски, која зборуваше за значењето на местото и за историските врски меѓу македонскиот и српскиот народ.
Програмата продолжува вечерва во 19 часот во КИЦ „Офицерски“ во Битола, каде што ќе се одржи свечена академија под наслов „110 години од Кајмакчалан“.
Утре, 30 септември, одбележувањето продолжува на врвот Ниџе, каде што е предвидена централна церемонија кај спомен-капелата „Свети Петар“, со почеток во 11 часот. Делегациите и посетителите кон Кајмакчалан ќе заминат во раните утрински часови преку Грција.
