Франција: Маск ја користи Икс за напади врз европски политичари

Францускиот министер за надворешни работи Жан-Ноел Баро го обвини Илон Маск дека ја користи социјалната мрежа Икс за организирање масовни интернет-кампањи за вознемирување на европски политички лидери и влијание врз јавните дебати. Обвинувањата ги изнесе во контекст на предупредувањата за странски обиди за дестабилизација на Франција пред претседателските избори закажани за следната година, објави „Гардијан“.

Говорејќи на конференција на Организацијата за економска соработка и развој, Баро предупреди дека силите што сакаат да ја поткопаат демократијата сè повеќе доминираат во информативниот простор и користат тактики за продлабочување на политичките поделби.

Според него, ваквите активности придонесуваат за јакнење на политичките движења со авторитарни цели во Европа и Северна Америка, што им оди во прилог на противниците на демократијата.

— реклама —

„Тие ги продлабочуваат поделбите во нашите општества. Нивната крајна цел е јасна: да ја преземат власта и да создадат услови во кои никогаш нема да мора да ја предадат“, изјави Баро.

Францускиот министер посебно се осврна на претседателските избори во Франција во 2027 година, на кои, според актуелните анкети, предност има лидерот на француската десница, Марин Ле Пен.

Тој оцени дека противниците на демократијата ги искористуваат чувствителните теми, како што се имиграцијата, секуларизмот и израелско-палестинскиот судир, за да поттикнуваат омраза и тензии во француското општество.

— реклама —

Како примери за странско влијание, Баро наведе неименувана израелска компанија, обвинета дека отворала лажни профили на француските социјални мрежи со цел да влијае врз јавните ставови за војната во Газа. Тој ги спомена и обвинувањата дека Азербејџан поттикнувал тензии за време на неодамнешните смртоносни немири во Нова Каледонија, француска територија во Тихиот Океан.

Посебно внимание привлече неговата изјава за Маск, сопственикот на Икс.

„Илон Маск организира масовни интернет-кампањи за вознемирување на европските лидери со цел да влијае врз дебатите, користејќи го виралниот досег на својата платформа“, тврдеше Баро.

— реклама —

Министерот ги спомена и протестите што во изминатите недели се одржуваа во Франција, при што ученици, студенти и синдикалци блокираа училишта и организираа поворки низ градовите. Според него, Русија, Кина и Иран, како и кругови поврзани со движењето МАГА во САД, ги искористиле настаните за ширење непријателски пораки.

Минатата недела во расправата за протестите се вклучиле и Маск и американскиот претседател Доналд Трамп, прикажувајќи ги исклучиво како последица на масовната миграција, без да ги земат предвид барањата на демонстрантите за подобри услови во училиштата, се наведува во извештајот.

Баро најави дека француската влада подготвува мерки за справување со платени или ангажирани влијателни личности на интернет кои го користат големиот досег на дигиталните платформи за ширење пораки со политичка цел.

Неговите изјави следуваат неколку дена откако британскиот премиер Енди Барнам изјави дека Русија се вмешала во референдумот за Брегзит.

Баро порача дека француската влада нема да толерира странско мешање, без оглед од каде доаѓа, оценувајќи дека станува збор за прашање на националниот суверенитет.

„Целта на Кремљ е јасно определена: да ги укине нашите либерални демократии и да ги замени со нов авторитаризам. И други актери се стремат кон истата цел и се обидуваат да ѝ диктираат на Европа кои демократии се добри, а кои лоши, зависно од тоа дали им одговараат на нивните интереси“, изјави францускиот министер.