По Трамп и Маск бара заминување на Зеленски: „Време е Украина да добие нов лидер“

Американскиот милијардер Илон Маск му се приклучи на претседателот на САД, Доналд Трамп, во повиците за промена на украинското раководство, оценувајќи дека украинскиот претседател Володимир Зеленски „отишол предалеку“ и дека е време Украина да добие нов лидер, објави украинскиот медиум „Киев пост“.

Изјавата на Маск следуваше откако Трамп вчера отворено побара промена на украинскиот претседател, обвинувајќи го Зеленски дека одбива да постигне мировен договор со Русија и дека со украинските напади врз руските рафинерии дополнително ја влошува глобалната енергетска криза.

Маск на својата социјална мрежа Икс сподели снимка од изјавите на Трамп за украинскиот претседател, со коментар: „Зеленски отишол предалеку“.

Во посебна објава, тој го поддржа барањето на Трамп за промена на власта во Киев.

— реклама —

„Се согласувам, време е Украина да добие нов лидер“, напиша Маск, според рускиот медиум РБК.

Неговите изјави доаѓаат во период на исклучително напнати односи меѓу Вашингтон и Киев, откако Трамп постигна договор со рускиот претседател Владимир Путин за зголемување на испораките на руско дизел-гориво на светскиот пазар.

Изјавите на Маск наидоа на позитивна реакција во Москва.

Кирил Дмитриев, шеф на Рускиот фонд за директни инвестиции и близок соработник на Путин, ја сподели објавата на Маск и ја нарече „пресвртница“, пренесува „Билд“.

— реклама —

Дмитриев и по изјавата на Трамп за потребата од промена на украинското раководство напиша на Икс дека украинските избори се приближуваат.

Русија подолго време го оспорува легитимитетот на Зеленски, со образложение дека неговиот петгодишен претседателски мандат требало да заврши во 2024 година.

Сепак, во Украина од почетокот на руската инвазија е во сила воена состојба, при која законот забранува одржување претседателски, парламентарни и локални избори. Поради тоа, Зеленски продолжува да ја извршува претседателската функција.

Трамп вчера повторно остро го нападна Зеленски, обвинувајќи го дека одбива да стави крај на војната и дека со нападите врз руската нафтена инфраструктура предизвикува проблеми за светската економија.

— реклама —

Американскиот претседател тврдеше дека повеќепати побарал од Зеленски да ги прекине нападите врз руските рафинерии, но дека украинскиот претседател ги игнорирал неговите барања.

Трамп порача и дека на Украина ѝ е потребен нов претседател кој ќе може да постигне договор со Москва.

Неговите изјави следуваат само еден ден по договорот со Путин за руското дизел-гориво, со кој Вашингтон сака да го ублажи растот на цените на енергенсите поврзан со војната против Иран.

Киев остро се спротивстави на договорот, предупредувајќи дека дополнителните приходи од извозот на гориво ќе ѝ овозможат на Русија да продолжи да ја финансира војната против Украина.

Украинските власти ги отфрлија обвинувањата на Трамп дека Зеленски е одговорен за продолжувањето на војната.

Украинскиот министер за надворешни работи Андриј Сибиха порача дека претседателот има поддршка од сопствениот народ. Киев повторно нагласи дека Русија ја започнала инвазијата и дека сноси одговорност за војната.

Зеленски, исто така, понуди прекин на украинските напади врз руските рафинерии доколку Москва за возврат ги запре нападите врз украинската енергетска инфраструктура.

Новиот судир меѓу Трамп и Зеленски доаѓа во време кога продолжуваат руските напади врз украинските градови, а Вашингтон се обидува повторно да ги придвижи мировните преговори.