Францускиот претседател Емануел Макрон изјави дека Франција никогаш не разгледувала распоредување воени бродови во Ормутски теснец, туку исклучиво безбедносна мисија во координација со Иран.
На прес-конференција во Најроби, Макрон нагласи дека Париз се противи на „секаква блокада, без оглед од која страна доаѓа“, мислејќи и на американските и на иранските активности во регионот.
„Никогаш не станало збор за распоредување бродови, но подготвени сме“, изјави Макрон.
Неговата реакција следува откако Иран се закани со „одлучен и непосреден одговор“ доколку Франција и Обединето Кралство испратат поморски сили во регионот, по најавите за можна меѓународна безбедносна мисија.
Макрон објасни дека е формирана ад хок мисија предводена од Велика Британија, во која учествуваат околу 50 држави и меѓународни организации.
„Во соработка со Иран и со цел намалување на тензиите со сите земји во регионот и со Соединетите Американски Држави, сакаме да обезбедиме продолжување на поморскиот сообраќај веднаш штом условите ќе го дозволат тоа“, рече францускиот претседател.
Тој нагласи дека приоритет е обезбедување непречен транспорт на храна, ѓубрива и енергенси низ Ормускиот Теснец, кој претставува една од најважните светски поморски рути за извоз на нафта и гас од Блискиот Исток.
Според Макрон, блокадата на теснецот веќе има сериозни последици врз светската економија, а особено врз африканските земји.
„Целиот африкански континент моментално страда поради блокадата“, изјави тој.
Минатата недела Франција соопшти дека нејзиниот носач на авиони Шарл де Гол поминал низ Суецки Канал за да биде подготвен доколку безбедносната мисија биде активирана во иднина.
