Француското обвинителство денеска отвори истрага против сопственикот на платформата Икс, Илон Маск, поради можни злоупотреби и ширење детска порнографија преку социјалната мрежа.
Како што пренесува Фигаро, обвинителството има намера да утврди дали Маск бил соучесник во ширењето на такви содржини. Тој претходно не се одѕвал на повикот на францускиот суд за неформален разговор.
„Истрагата покажа дека постојат причини за покренување постапка со назначување истражен судија. Франција го почитува меѓународното право и сака правилата воспоставени во Франција и Европа, преку демократски процес, да се применуваат и тука“, изјавил пратеникот од партијата на францускиот претседател Емануел Макрон, Ерик Боторел, кој претходно поднел пријави против непознати лица за ширење детска порнографија на платформата Икс.
„Веруваме во законот и во меѓународното право. Ако платформите не сакаат да ги применуваат нашите правила на нашата територија, ризикуваат да бидат санкционирани, а потоа и забранети“, додал Боторел.
Истрагата ги опфаќа и алгоритмите на платформата Икс поради сомнежи за мешање во политичките процеси во Франција, како и ширење сексуално експлицитни лажни дигитални содржини создадени со вештачка интелигенција и други спорни материјали генерирани преку системот за вештачка интелигенција „Грок“.
Таквите содржини претставуваат дигитално манипулирани видеоснимки, аудиоматеријали или фотографии во кои со помош на вештачка интелигенција реалистично се менува нечиј изглед или глас.
Маск претходно ги отфрли обвинувањата, оценувајќи дека станува збор за „политички мотивирана кривична истрага“.
ЕУ во јануари отвори посебна истрага против платформата Икс поради спорни содржини, додека британскиот регулатор за заштита на податоци во февруари покрена одделна постапка против компаниите Икс и xAI поради загриженост за заштитата на личните податоци.
