Остра реакција за состојбата со водата во Гостивар упати Јон Фрчкоски, кој преку објава на социјалните мрежи ја критикуваше реакцијата на надлежните институции.
Фрчкоски во објавата наведува дека граѓаните четири недели пиеле вода за која тврди дека била загадена со фекалии, при што, според него, повеќе од 5.000 луѓе имале здравствени проблеми, а над 2.000 биле хоспитализирани.
Тој реагира и на актуелното уверување дека водата повторно е безбедна за употреба, оценувајќи дека со организирањето здравица се испраќа порака дека проблемот е надминат.
„Одговорност треба за сите што ја загадија водата, прикриваа и не превенираа ова да му се случи на цел град!“, напиша Фрчкоски.
Во објавата тој ја опишува ситуацијата како неприфатлива за европски град во 21 век и бара да има одговорност за случувањата со водоснабдувањето во Гостивар.
