„Гаѓаат дата-центри и мобилни комуникации“ – Зеленски најави одговор кон Русија

Украинскиот претседател Володимир Зеленски најави одговор на руските напади врз мостови, дата-центри и телекомуникациска инфраструктура, обвинувајќи ја Москва дека намерно ја засилува ескалацијата и погодува објекти што ги користат цивилите.

Зеленски зборуваше на заедничката прес-конференција со германскиот канцелар Фридрих Мерц во Киев, во ден кога руските сили повторно го погодија Северниот мост во украинската престолнина.

— реклама —

„Ги погодија нашите магацини – ‘Нова пошта’, ‘Укрпошта’ и други. Ние им дадовме соодветен одговор со удар врз ‘Wildberries’. Сега ги гаѓаат мостовите. Навистина мислат дека нема да одговориме?“, рече Зеленски.

Украинскиот претседател особено се осврна на нападите врз дигиталната и телекомуникациската инфраструктура, оценувајќи дека станува збор за цели што директно го засегаат секојдневниот живот на населението.

„Гаѓаат дата-центри. Сето тоа ги погодува обичните луѓе. Тоа сигурно не е воена инфраструктура. Како можат да гаѓаат дата-центри и мобилни комуникации? Како Путин не размислува дека мобилните комуникации не се користат само во Киев и Украина, туку и во Москва?“, изјави Зеленски.

— реклама —

Тој оцени дека последните руски напади покажуваат оти Москва во моментов се определува за натамошно засилување на конфликтот, а не за негово смирување.

„Навистина сум изненаден од оваа сурова желба за ескалација секој ден. Тој смета на постојана ескалација и многу го сака тоа“, рече Зеленски.

— реклама —

Според него, случувањата се порака и до оние кои сметаат дека војната може брзо да заврши единствено преку повик до рускиот претседател за преговори.

„Ова е одговор за сите кои веруваат дека е доволно само да го замолат Путин и тој навистина ќе ја прекине војната. Тоа едноставно нема да се случи“, порача украинскиот претседател.

Во Киев денеска престојува германскиот канцелар Фридрих Мерц, кој за време на посетата најави нов пакет германска помош. Берлин обезбедува една милијарда евра дополнителна воена поддршка и уште 350 милиони евра за обнова и заштита на украинската енергетска инфраструктура.

— реклама —

Мерц порача дека Германија нема да биде заплашена од руските напади и го повика Путин да ја прекине војната и нападите врз цивилите.

Посетата се одвива во услови на засилени руски воздушни напади врз Киев. Северниот мост денеска повторно беше погоден со дрон, а украинските власти во изминатите денови регистрираа напади и врз други клучни сообраќајни и цивилни инфраструктурни објекти во главниот град.