Русија отвора берзи за тргување со криптовалути, познат е датумот на почеток

Русија се подготвува да воведе организирано тргување со криптовалути на берзите, откако Централната банка на земјата усвои нови правила за работењето на организаторите на овој пазар. Првите тргувања би можеле да започнат на 22 ноември.

— реклама —

Московската берза планира да го започне тргувањето на 1 декември, додека Берзата во Санкт Петербург најави дека би можела да ја воведе оваа можност до крајот на 2026 година, пренесува „Комерсант“.

— реклама —

Новите правила ги обврзуваат берзите да ги регистрираат учесниците на пазарот, меѓу кои брокерите и друштвата за управување со имот, да водат евиденција за налозите и трансакциите и да го следат нивното извршување. Ќе треба и редовно да пресметуваат и објавуваат различни ценовни показатели, вклучувајќи тековни, просечни пондерирани, пазарни и заклучни цени.

— реклама —

Според процените на експертите, почетното тргување најверојатно ќе се потпира на инфраструктурата на Московската берза, како и на депозитарните системи на „Сбербанк“ и ВТБ. Останатите учесници ќе се вклучуваат постепено.

— реклама —

Сепак, поради недоволно развиената инфраструктура, ограничениот број учесници и нејаснотиите во регулативата, во почетната фаза не се очекува голема ликвидност. Експертите сметаат дека пазарот нема да функционира во полн обем со поголем број трансакции пред 2027 година.