Универзитетската клиника за гинекологија и акушерство во Скопје ги отфрла дел од наводите на медицинската сестра Љубица Шавреска за третманот што го добила таму пред нејзината бременост да заврши со загуба на плодот. Од Клиниката за „Скопје1“ велат дека пациентката добила токолитична и симптоматска терапија, дека не била во животозагрозувачка состојба и дека си заминала на сопствено барање, спротивно на советот на лекар. Истовремено, случајот ќе го разгледува интерната комисија за контрола на квалитетот.
Одговорите за „Скопје1“ ги достави директорката на ГАК, проф. д-р Ирена Алексиоска Папестиев, откако Шавреска јавно изнесе тешко сведоштво за третманот во повеќе здравствени установи додека била во 24. гестациска недела.
Според ГАК, Шавреска била примена на Клиниката на 10 септември во 03:22 часот, во 24+2 гестациска недела, со дијагноза за заканувачко предвремено породување и скратување на грлото на матката со присутен „фанелинг“.
Од Клиниката наведуваат дека за време на хоспитализацијата биле направени трансабдоминален ултразвучен преглед на плодот, постелката и околуплодовата течност, како и трансвагинален ултразвук на грлото на матката. Прегледите, според одговорот, ги извршил лекар субспецијалист од Одделот за патолошка бременост.
Биле направени и анализи за крвна група и Рх-фактор, комплетна лабораториска евалуација и било назначено микробиолошко испитување за уринокултура.
„За нив постои комплетна документација во медицинската историја од хоспитализацијата, по што е ординирана симптоматска и токолитична терапија, соодветна за помала гестациска недела. Клиничката евалуација и терапијата се комплетирани согласно протокол за заканувачко предвремено породување“, одговори директорката на ГАК.
Од Клиниката наведуваат и дека при приемот Шавреска пријавила чувство на болки во стомакот, додека при вагиналниот преглед било констатирано „оскудно темно-црвено крварење“.
Ова се разликува од јавното сведоштво на Шавреска, која тврдеше дека во текот на престојот болките станале неподносливи и дека започнала обилно да крвари. Таа тврдеше и дека не знаела каква терапија прима и дека повеќепати барала лекарска помош.
ГАК категорично го отфрла нејзиниот навод дека ѝ било кажано само да ја продолжи терапијата што ја земала дома и да ја чека следната визита.
„Не се точни наводите дека ѝ било посочено да ја продолжи домашната терапија и да чека следна визита, бидејќи Клиниката располага со стручен персонал 24 часа, седум дена во неделата. Во ниту еден момент од приемот и хоспитализацијата пациентката не се наоѓала во животозагрозувачка состојба која би барала итна акушерска интервенција“, велат од ГАК за „Скопје1“.
Во своето јавно сведоштво Шавреска ја посочи и д-р Адела Стефанија, опишувајќи разговори што, според неа, ги водела со докторката додека барала помош. Од ГАК, пак, одговараат дека „наведениот доктор“ не ја прегледал пациентката бидејќи таа веќе имала детална субспецијалистичка евалуација од лекар од истиот оддел.
Клиниката тврди и дека Шавреска била информирана за својата здравствена состојба, терапијата и ризиците во рамките на целокупната клиничка слика.
Од Клиниката велат дека документацијата покажува оти пациентката била испишана на свое барање и одговорност, со своерачен потпис, како што напиша и родилката.
„Пациентката била испишана на свое барање и одговорност, со своерачен потпис во медицинската документација, спротивно на советот и укажаните ризици од лекар специјалист“, одговорија од ГАК.
И покрај тоа што Клиниката ги отфрла клучните наводи за медицинскиот третман, случајот нема да заврши само со нивниот одговор до „Скопје1“. Директорката најавува внатрешна проверка по поплаката на пациентката за односот кон неа.
„Клиниката има интерна комисија за контрола на квалитетот на работата, која постапува согласно протоколи за работа. Со оглед на тоа дека постои поплака од пациентка, случајот детално ќе биде разгледан од горенаведената комисија“, велат од ГАК.
Шавреска претходно јавно се обрати до Министерството за здравство како медицинска сестра со десетгодишно искуство, но и како пациентка и мајка која ја загубила бременоста. Таа опиша третман во повеќе здравствени установи во Охрид, Струга и Скопје и тврдеше дека во најтешките моменти морала да бара „врски“ за да добие лекарска помош.
Шавреска не тврдеше дека конкретен лекар или медицинска постапка ја предизвикале загубата на бременоста, туку дека начинот на кој, според неа, системот се однесувал кон неа ја направил загубата многу потешка и потрауматична.
Бидејќи родилката ја спомена и охридската гинекологија каде првично била на третман, „Скопје1“ испрати прашања, на кои се најавени одговори - по што ќе бидат пренесени до јавноста.
Од Охрид до Скопје барала помош, крварела и молела за лекар со страшни болки – бремена медицинската сестра сведочи за часовите пред да го загуби плодот
Медицинската сестра Љубица Шавреска јавно се обрати до Министерството за здравство и до министерот, изнесувајќи тешко лично сведоштво за третманот што, како што тврди, го добила во повеќе здравствени установи додека била во 24+3 гестациска недела, пред нејзината бременост да заврши со загуба на плодот.Шавреска, која наведува дека десет години работи во здравството – две години во приватниот и осум во јавниот сектор – детално го опишува патот од првите болки во Охрид, преку преглед во Струга, пов
Македонија | пред 6 часа
