Проблемот со уличните кучиња повторно беше актуализиран на седница, при што советникот Ѓорѓи Галетановски побара конкретни одговори од директорот на ЈП „Лајка“ за мерките што се преземаат за справување со состојбата во Скопје.
Галетановски истакна дека уште пред четири до пет месеци му поставил прашања на градоначалникот, но оти сега очекува одговори директно од новоименуваниот директор на претпријатието.
„Прашањата се во име на неколку стотици граѓани. Уличните кучиња сè уште прават хорор по скопските општини – дали е Карпош, дали Кисела Вода – состојбата е многу очајна. Има каснати граѓани, чопори се движат по улиците“, рече Галетановски.
Тој праша до каде е планот за проширување на капацитетите на стационарот, дали се вработени нови заловувачи и дали директорот е запознаен со наводите за дислоцирање на улични кучиња.
„Дали е запознаен со ситуацијата на дислоцирање на улични кучиња, која се случи и во Кисела Вода – имаше пријава дека вработен од неговото претпријатие дислоцирал куче на депонијата Дрисла, па потоа го вратил?“, праша советникот.
Тој изрази надеж дека директорот ќе даде одговори на поставените прашања, оценувајќи дека состојбата со бездомните кучиња е полоша од претходно.
„Се надевам дека е тука и ќе ми одговори, бидејќи ситуацијата е многу полоша од онаа што ја имавме претходно“, порача Галетановски.
