Советникот во Град Скопје, Ѓорѓи Галетановски, се приклучи на реакциите пред најавениот концерт на српскиот трап-изведувач Драгомир Деспиќ – Десингерица во Охрид, повикувајќи на граѓански отпор против неговиот настап.
Во објава на социјалните мрежи, Галетановски напиша:
„Може некој да му забрани на дебилов да пее у Охрид да понижува наши деца? На пример 1000 родители да застанат пред диско и да го протераат?“
Неговата реакција доаѓа откако во јавноста се отвори дебата за настапот на Десингерица, закажан за 5 август во Охрид.
Контроверзниот српски изведувач и претходно предизвикуваше бурни реакции поради своите сценски настапи. Последниот концерт, во клубот „Ла Плаја“, стана вирален откако на сцената со машинка бричеше посетители од публиката, а во минатото на своите настапи плукал кон публиката, ги полевал присутните со вода и ги удирал со патика по главата.
И покрај критиките, неговите концерти низ регионот редовно привлекуваат голем број посетители, а засега нема најава дека концертот во Охрид ќе биде откажан.
