Советникот на СДСМ во Советот на Град Скопје, Ѓорѓи Галетановски – Чомбе, на денешната седница остро го критикуваше, како што оцени, неефикасното справување со проблемот со уличните кучиња во главниот град.
Галетановски посочи дека граѓаните секојдневно испраќаат фотографии од чопори кучиња на различни локации во Скопје, меѓу кои Расадник, Сити Мол, Аеродром и кејот, а состојбата, според него, не е променета во изминатите седум месеци.
„Три пати поставуваме прашања, три пати добиваме само формулирани одговори кои не донеле ниеден резултат“, рече тој.
Советникот ја доведе во прашање и работата на ЈП „Лајка“, прашувајќи дали институцијата има само директор на функција или и директор кој фактички презема конкретни мерки.
Тој се осврна и на наводите за појава на бели комбиња од кои, како што биле информирани, се истоварувале кучиња низ градот.
„Дали, кога ги видел тие бели комбиња што истовараат кучиња, побарал асистенција од централната власт, на пример од МВР? Дали се обратил и презел конкретни мерки или ќе се базираме само на ‘бели комбиња’?“ праша Галетановски.
Тој го критикуваше и планираниот ребаланс на средствата за „Лајка“, оценувајќи дека не гледа доволно конкретни решенија за проширување и реконструкција на стационарот.
Галетановски праша и зошто се планира набавка на опрема за груминг, односно машинки за шишање кучиња, наместо средствата да се насочат кон зголемување на капацитетите и решавање на проблемот со бездомните животни.
„Дали ќе отвораме ние фризерски салон или ќе биде тоа стационар за заловување, стерилизирање и враќање на улица на кучињата?“ праша тој.
Според Галетановски, нема доволно информации ниту за тоа колку кучиња моментално има на улиците, ниту колку слободни боксови има во стационарот.
Тој посочи и на, како што оцени, недоволната промоција на вдомувањето на кучињата и недостигот од соодветна опрема и униформи за вработените.
„Место да даваме пари за некои наводни проблеми во ‘Лајка’, да бидеме конкретни и за проширување на стационарот и за мерките што треба да се преземат“, рече Галетановски.
Тој порача дека проблемот со уличните кучиња станува сè поголем и побара раководството на „Лајка“ да преземе конкретни активности.
„Ако планира да работи малку и де факто директорот – нека работи. Ако не, викнете, најдете дали од власта, од опозиција, од невладин сектор, ставете некој што ќе почне да се занимава со овој голем проблем“, порача Галетановски.
