Европската интеграција треба да донесе конкретни подобрувања во секојдневниот живот на граѓаните, а не да се сведе само на усогласување на законите и исполнување на критериумите, порача претседателот на Собранието, Африм Гаши, на Граѓанскиот форум „Северна Македонија и иднината на Европа: Граѓаните во срцето на проширувањето на ЕУ“. Форумот се одржува од 25 до 27 септември во Скопје, во соработка со Европскиот парламент.
Гаши истакна дека европскиот пат треба да значи подобро образование и здравствена заштита, достоинствени работни места, функционални институции, еднаква правда, борба против корупцијата и создавање услови младите својата иднина да ја гледаат во земјата.
Според него, граѓаните треба постојано да бидат вклучени во процесот на европската интеграција, а европската агенда да биде надпартиска и долгорочна определба.
„Европскиот пат не може да биде успешен ако се води само во институциите. Токму затоа ваквите форуми се важни“, рече Гаши, нагласувајќи дека граѓаните треба да имаат можност да учествуваат во креирањето на политиките, да предлагаат решенија и да бараат одговорност од институциите.
Австрискиот европратеник Томас Вајц порача дека напредокот на Македонија е важен независно од тоа дали земјата еден ден ќе стане членка на Европската Унија. Тој оцени дека европската интеграција треба да се гледа и како процес што носи подобри услови за живот.
Вајц посочи дека меѓу прашањата на кои треба да им се посвети внимание се чистиот воздух и водата, условите за живот, владеењето на правото и еднаквата примена на законите. Според него, грижата за овие прашања има и директно економско влијание.
Словачкиот европратеник Бранислав Ондруш го истакна значењето на директното учество на граѓаните во носењето одлуки. Тој порача дека политичарите треба да работат не само за граѓаните, туку и заедно со нив.
„Важно е да се води политика не само за луѓето, туку и со луѓето“, рече Ондруш.
На форумот учествуваат граѓани, пратеници во Европскиот парламент, пратеници во Собранието и експерти, а преку директен дијалог се разговара за европската интеграција, демократскиот развој, реформите и учеството на граѓаните.
