Претседателот на Собранието, Африм Гаши, денеска ги појасни своите ставови во врска со пресудата на Хашкиот суд за четворицата поранешни водачи на ОВК – Хашим Тачи, Кадри Весели, Јакуп Красниќи и Кадри Весели. Тој нагласи дека, и покрај тоа што ја извршува функцијата претседател на законодавниот дом, има право на личен став како граѓанин и политичар.
Во објава на социјалните мрежи тој порача дека четворицата осудени за воени злосторства „за албанскиот народ остануваат како ослободители на Косово“.
„Војната на ОВК, жртвите и несебичноста на оние што ја предводеа и беа нејзин дел, го претставуваат патот што доведе до слободата на Косово и до нова ера на мир и стабилност во регионот. Денешната пресуда е од прв степен, бидејќи борбата за правда продолжува“, напиша Гаши.
Неговата изјава предизвика реакции од опозицијата. Од Социјалдемократите оценија дека ставот на Гаши е несоодветен со оглед на тоа што тој е претседател на Собранието и претставник на држава која има аспирации за членство во Европската Унија.
Во однос на работата на Собранието, Гаши рече дека се разговара за надминување на проблемите со гласањето на законите за кои е потребно Бадентерово мнозинство. Тој посочи дека со координаторите на пратеничките групи се бара решение за да може законодавниот дом непречено да функционира.
За 123. пленарна седница, закажана за 29 септември, се предложени десет закони по скратена постапка, меѓу кои и законски решенија поврзани со јавната администрација и високата служба. Гаши појасни дека доколку некој предлог не го добие потребното Бадентерово мнозинство, постапката завршува и истиот закон не може повторно да биде поднесен во следните три месеци.
На редовната координација со координаторите на пратеничките групи била отворена и темата за измените на Изборниот законик. Според Гаши, партиите прво треба да ги усогласат своите позиции, по што би можела да биде свикана работна група за продолжување на разговорите.
Тој додаде дека нема информација дали пратеничките групи добиле покана за средба со министерот за правда.
Во врска со законските решенија за минималната плата, Гаши најави дека тие би требало да се најдат пред пратениците на почетокот на октомври. Тој изрази личен став дека примањата и приходите треба да се зголемуваат, посочувајќи дека зголемувањето на минималната плата би имало влијание и врз просечната плата.
На координацијата било разговарано и за работата на собраниските анкетни комисии, како и за барањата на семејствата на загинатите во Кочани. Гаши рече дека официјално, преку собраниската архива или електронската пошта, сè уште нема добиено писмо од родителите, но дека ја видел нивната јавна иницијатива и ќе провери за што станува збор.
Во Собранието постојат различни ставови околу тоа дали прво треба да заврши работата на постојната Анкетна комисија, па потоа да се формира нова, или двете комисии да работат паралелно. Гаши информираше дека од координаторот на Левица има најава оти на почетокот на октомври би можела да биде свикана постојната Анкетна комисија, со можност за донесување заклучоци, што би отворило простор и за формирање на новата комисија.
