„Убеден сум дека нема да има предвремени парламентарни избори“, вели Гаши

Претседателот на Собранието, Африм Гаши, смета дека Македонија нема да оди на предвремени парламентарни избори, иако прашањето во изминатиот период повторно се отвора во политичките кругови.

„Според мене, не треба да има избори и убеден сум дека нема да има предвремени парламентарни избори. Јас сум убеден од мое лично име“, рече Гаши на денешниот брифинг со новинарите.

— реклама —

На прашањето на што го темели ваквиот став, претседателот на Собранието одговори дека тоа е негова „политичка интуиција“.

— реклама —

Гаши информираше и за денешната редовна координација со претседателите и координаторите на пратеничките групи. На средбата, претставникот на Левица го отворил прашањето за Изборниот законик, во контекст на ставовите што се изнесуваат во врска со можноста за предвремени избори.

Претседателот на Собранието оцени дека за ова прашање треба да се разговара и посочи дека, доколку постои подготвеност, работната група во Собранието и координаторите би можеле да ги продолжат разговорите за Изборниот законик.

— реклама —

Темата за евентуални предвремени парламентарни избори во последно време повторно е актуелна меѓу политичките партии. Премиерот Христијан Мицкоски повеќепати посочува дека намерата на Владата е да го заврши мандатот добиен од граѓаните до 2028 година. Сепак, тој исто така изјави дека доколку опозицијата предизвика избори, власта е подготвена да одговори и да победи.

— реклама —

Од СДСМ велат дека се подготвени за избори, но дека нема да му служат како алиби на премиерот за нивно распишување.

Од друга страна, потпретседателот на ДУИ, Бујар Османи, чија партија се залага за предвремени избори, изјави дека комуницирале со ВМРО-ДПМНЕ и дека очекува одржување предвремени парламентарни избори.