Герасимовски: 149 млади центарци добија по 10.000 денари за возачка дозвола

Вкупно 149 млади жители на Општина Центар од почетокот на годината до крајот на октомври добиле финансиска поддршка од 10.000 денари за обука и полагање возачки испит за Б-категорија.

— реклама —

Градоначалникот Горан Герасимовски информира дека општината продолжува со спроведувањето на оваа мерка, чија цел е да им помогне на младите и нивните семејства да ги намалат трошоците за стекнување возачка дозвола.

— реклама —

„Ме радува што сè повеќе центарци ја користат оваа можност. Со субвенцијата од 10.000 денари им помагаме на семејствата да ги намалат трошоците, а младите ги охрабруваме да станат одговорни и совесни возачи“, изјави Герасимовски.

Право на финансиска поддршка имаат младите родени во 2006, 2007 и 2008 година. Новина оваа година е што средствата може да се исплатат и на трансакциската сметка на родител, а не само на сметката на барателот.

— реклама —

За аплицирање потребни се барање за субвенција, копија од лична карта, копија од трансакциска сметка, доказ за уплата во автошкола и потврда дека автошколата е регистрирана на територијата на Општина Центар.

— реклама —

Заинтересираните барањата можат да ги достават во архивата на Општина Центар, барака број 6, секој работен ден од 9 до 15 часот.