Германија станува сè позависна од Кина кога станува збор за стратешки важни производи како литиум-јонски батерии, соларни панели и антибиотици, предупредува нова студија.
Според анализата на Фондација „Фридрих Науман“, околу две третини од директниот увоз на литиум-јонски батерии во Германија минатата година потекнувал од Кина, додека пред две години уделот бил под 50 проценти.
Кај соларните панели зависноста дополнително се зголемила – од околу 89 на речиси 93 проценти, а кај антибиотиците уделот на кинескиот увоз пораснал од над 65 на околу 73 проценти.
Авторот на студијата, Фредерик Шпор, предупредува дека Германија не успева да ја диверзифицира набавката во критичните области и станува уште поранлива.
Анализата покажува дека Кина има доминантна улога и кај ретките метали неопходни за производство на електромотори, меѓу кои празеодимиум, неодимиум и самариум.
Во меѓувреме, увозот од Кина продолжува да расте. Според податоците на Ројтерс и „Германија трејд енд инвест“, германскиот увоз од Кина во првиот квартал достигнал 43,5 милијарди евра, што е раст од 6,4 проценти на годишно ниво.
Експертите предупредуваат дека агресивната кинеска извозна политика создава силен притисок врз германската автомобилска, машинска, хемиска и авиоиндустрија и носи ризик од деиндустријализација.
Во такви услови, германската министерка за економија Катарина Рајхе денеска престојува во Кина, каде што треба да разговара за идната економска соработка и условите за фер конкуренција.
Извршниот директор на Тисенкруп, Мигел Лопез, оцени дека кинеските компании треба повеќе да инвестираат и да произведуваат во Европа, додека германската машинска индустрија бара поцврст став на Берлин кон кинеските субвенции и трговски практики.
