Русија сè почесто враќа ранети војници и лица со инвалидитет на првата линија на фронтот во Украина, а дел од нив, според сведоштва на украински воени лица и руски провоени и антивоени канали, се користат и за откривање на украински позиции.
„Форбс“ пишува дека ваквата практика доаѓа во услови на огромни руски загуби и сè поголеми тешкотии Москва да обезбеди доволно свежа пешадија за продолжување на офанзивните операции.
Центарот за стратешки и меѓународни студии во јулски извештај процени дека руските вкупни загуби – загинати и ранети – достигнале околу 1,4 милиони луѓе. Украинскиот Генералштаб, пак, тврди дека само на 11 август Русија изгубила уште 1.190 војници. Овие бројки не можат независно да се потврдат во реално време.
Поранешниот офицер на украинската 47. механизирана бригада, Микола Мелник, тврди дека дел од ранетите и инвалидизираните војници се испраќаат напред како прв бран.
Според него, нивното движење кон украинските линии треба да предизвика реакција од беспилотни летала и огнени позиции, по што руските сили се обидуваат да ги лоцираат и уништат тие точки пред да испратат поспособна пешадија.
„Група ранети или инвалидизирани војници ја испраќаат напред, тие загинуваат, а руските сили потоа набљудуваат од каде полетуваат украинските дронови и каде се огнените позиции“, изјавил Мелник.
Тој тврди дека руските команданти често добиваат наредби за напад без доволно борбено способни луѓе и дека, бидејќи не сносат одговорност за големите загуби, на фронтот испраќаат „ранети, инвалиди и кого ќе стигнат“.
Слични сведоштва доаѓаат и од руски извори.
Во мај, 50-годишниот Сергеј Александрович Писарчик, припадник на руската 69. моторизирана стрелачка дивизија, испратил последна видеопорака до семејството, која ја објавил рускиот антивоен телеграм-канал „Mobilization News“.
На снимката, според текстот, се гледале шест војници со инвалидитет, дел од нив на патерици, кои тргнувале во борба. На располагање имале само три панцири и две автоматски пушки.
Уште подраматични тврдења објавил рускиот воен телеграм-канал „Браќа по оружје“, пренесувајќи сведоштва на војници од 51. армија.
„Делумно закрепнатите ги праќаат на првата линија, ранетите не ги повлекуваат, туку ги туркаат понатаму. Нема отсуство, нема обесштетување. Нема одмор. Нема ротации“, се наведува во едно од сведоштвата.
Каналот пренел и наводна наредба од командир по преглед на ранет војник: „Врзете му ја патерицата за ногата и пратете го на линијата“.
За системско враќање на тешко повредени војници на фронтот пишувала и руската блогерка Анастасија Кашеварова, поранешна советничка на претседателот на Думата, Вјачеслав Володин.
Таа уште во 2024 година опишала случај на доброволец со сериозна повреда на ’рбетниот мозок и парализирани нозе, за кого, според нејзиното сведоштво, било разгледувано повторно испраќање на фронтот.
Еден од проблемите, според анализата, е и начинот на кој дел од руските команданти го прикажуваат напредувањето.
Провоени блогери и аналитичари тврдат дека команданти понекогаш пријавуваат поголем територијален успех од реалниот, што создава дополнителен притисок единиците подоцна со нови напади да го „покријат“ веќе пријавеното напредување.
Во такви услови се испраќаат мали групи кои треба да се пробијат до украинските позиции, понекогаш само за да постават руско знаме како доказ дека некоја точка е освоена, иако контролата над теренот не е стабилна.
Поранешниот британски војник Шон Пинер, кој се бореше на украинска страна во Мариупол и беше заробен во 2022 година, оценува дека Русија се обидува да ја одржи бројноста на фронтот без нова општа мобилизација, која би носела политички ризици дома.
„Враќањето на ранетите во борба, празнењето на болничките кревети и пополнувањето на десеткуваните јуришни единици им помага да ја одржат бројноста без отворено признавање колкав е вистинскиот притисок“, вели Пинер.
Тој предупредува дека таквата стратегија има цена: колку повеќе една армија се потпира на исцрпени, повредени или слабо мотивирани луѓе, толку потешко е долгорочно да ги задржи моралот, иницијативата и квалитетот на операциите.
Наводите за испраќање ранети и војници со инвалидитет на фронтот доаѓаат од комбинација на украински, руски и независни извори, но поради условите на војната и ограничениот пристап до фронтот, поединечните случаи не можат секогаш независно да се проверат.
